Home ពត៌មាន ទ័ពមួកខៀវកម្ពុជានឹងមកពីម៉ាលីវិញ​ជាង​ ២០០នាក់​ នៅដេីមខែក្រោយ

ទ័ពមួកខៀវកម្ពុជានឹងមកពីម៉ាលីវិញ​ជាង​ ២០០នាក់​ នៅដេីមខែក្រោយ

26
0

ភ្នំពេញ ​៖ ​យោង​តាម​មជ្ឈមណ្ឌល​ជាតិ​រក្សា​សន្តិភាព​បាន​ឲ្យ​ដឹង​ថា ​នៅ​ដើមខែ​ក្រោយនេះ​ កងកម្លាំង​រក្សា​សន្តិភាព​កម្ពុជា​(​មួក​ខៀវ​កម្ពុជា​)​ជាង​២០០​នាក់​ផ្នែក​ថែទាំ​ព្រលាន​យន្តហោះ​និង​កម្ទេច​គ្រឿងផ្ទុះ​ក្រប​ខណ្ឌ​អង្គការសហប្រជាជាតិ​ នៅ​សាធារណរដ្ឋ​ម៉ាលី​ ដែល​នឹង​បញ្ចប់​បេសកកម្ម​MINUSMA​នឹង​ត្រូវ​វិលត្រឡប់​មក​ប្រទេស​កម្ពុជា​ នៅ​ដើមខែ​កញ្ញា​ឆ្នាំ​២០២០​ខាងមុខនេះ​។

​​បើ​តាម​មជ្ឈមណ្ឌល​ជាតិ​រក្សា​សន្តិភាព​កងកម្លាំង​រក្សា​សន្តិភាព​កម្ពុជា​ បា​នប​ញ្ជូន​កងកម្លាំង​រក្សា​សន្តិភាព​កម្ពុជា​ប្រមាណ​ជាង​៣០០​នាក់ ​ទៅ​ចូលរួម​ថែរក្សា​សន្តិភាព ​ក្នុង​ក្រប​ខណ្ឌ​អង្គ​ការ​សហប្រជាជាតិ​ នៅ​សាធារណរដ្ឋ​ម៉ាលី​ ដែល​លើក​ទី​១​បា​នប​ញ្ជូន​​ចំនួន​៨០​នាក់​ កាលពី​ថ្ងៃ​ទី​១០​ ខែ​កក្កដា​ ឆ្នាំ​២០២០​កន្លងទៅ​និង​លើក​ទី​២​នេះ ​គ្រោង​នឹង​ប​ញ្ជូន​មកដល់​កម្ពុជា​នៅ​ដើមខែ​ក្រោយនេះ​។​

បើ​តាម​ក្រសួងសុខាភិបាល​ក្នុងចំណោម​កង​កម្លាំង​រក្សា​សន្តិភាព​កម្ពុជា​(​មួក​ខៀវ​កម្ពុជា​)៨០​នាក់​នោះ ​ក្រសួង​បាន​រក​ឃើញ​អ្នកមាន​តេស្ត​វិជ្ជមាន​ចំនួន​៩​នាក់​ ហើយ​អ្នក​នៅសល់​៧១​នាក់​ទៀត​កំពុង​ធ្វើ​ច​ត្តា​ឡី​ស័ក​រយៈពេល​១៤​ថ្ងៃ​នៅ​វិទ្យាល័យ​បុរី​១០០​ខ្នង​។ ចំណែក​កងកម្លាំង​រក្សា​សន្តិភាព​កម្ពុជា​(​មួក​ខៀវ​កម្ពុជា​)​ជាង​២០០​នាក់​ទៀត​ ដែល​ត្រូវ​មកដល់​នៅ​ខែក្រោយ​ក៏​នឹង​ត្រូវ​ធ្វើ​តេស្ត​រកកូ​វីដ​១៩​ដូច​មុន​ដែរ​ ហើយ​បច្ចុប្បន្ន​ផ្នែក​មជ្ឈមណ្ឌល​ជាតិ​រក្សា​សន្តិភាព​កំពុង​សហការ​ជាមួយ​ក្រសួងសុខាភិបាល​រក​ទីតាំង ​សម្រាប់​ធ្វើ​ច​ត្តា​ឡី​ស័ក​ដល់​ពួកគាត់​ពេល​មក​ដល់​ប្រទេស​កម្ពុជា​។​

គួរ​បញ្ជាក់​ថា​ កាលពី​ថ្ងៃ​ទី​១០ ខែ​សីហា ឆ្នាំ​២០២០ នាយ​ឧ​ត្ត​ម​សេនីយ៍ សែម សុវណ្ណនី អនុប្រធាន​គណៈកម្មាធិកា​រ​ជាតិ និង​ជា អគ្គនាយក​មជ្ឈមណ្ឌល​ជាតិ​រក្សា​សន្តិភាព បាន​ចុះ​ពិនិត្យ​កងកម្លាំង​មួក​ខៀវ​កម្ពុជា ៧១​នាក់ មក​បន្ត​ធ្វើ​ច​ត្តា​ឡី​ស័ក​នៅ​វិទ្យាល័យ ហ៊ុន សែន បុរី​១០០​ខ្នង ខណ្ឌ​សែន​សុខ រាជធានី​ភ្នំពេញ​។ នាយ​ឧ​ត្ត​ម​សេនីយ៍ សែម សុវណ្ណនី បាន​អរគុណ​ដល់​សម្តេច​តេ​ជោ ហ៊ុន សែន និង​លោក ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​រៀបចំ​ទីតាំង​ច​ត្តា​ឡី​ស័ក នៅតាម​សាលារៀន​នានា​នៅ​ទូទាំងប្រទេស សម្រាប់​បងប្អូន​ប្រជាពលរដ្ឋ ពលករ មន្ត្រីរាជការ កងកម្លាំងប្រដាប់អាវុធ និង​ជនបរទេស​គ្រប់រូប ចូលម​ក​កម្ពុជា ក្នុង​បំណង​ប្រយុទ្ធប្រឆាំង​ការឆ្លង​រីក​រាលដាល​មេរោគ​កូ​វីដ​១៩​។

​លោក អគ្គនាយក បានធ្វើការ​លើកទឹកចិត្ត​ដល់​កងកម្លាំង​មួក​ខៀវ​ទាំងអស់ ត្រូវ​បន្ត​អនុវត្ត​តាម​ការ​ណែនាំរ​បស់​ក្រសួងសុខាភិបាល ចូលរួម​ប្រយុទ្ធ​ប្រឆាំង​នៃ​ការ​ឆ្លង​រីក​រាល​នៃ​មេរោគ​កូ​វីដ​១៩ ស្របតាម​អនុសាសន៍​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​អនុវត្ត​តាម​វិធាន ក្រសួងសុខាភិបាល​កម្ពុ​ជា បាន​ដាក់​ចេញ និង​កម្លាំង​ត្រូវ​មាន​ស្មារតី​រឹងមាំ​៕

ប្រភព៖​ កម្ពុជាថ្មី