កម្ពុជាលក់បណ្ណចូលទស្សនារមណីយដ្ឋានអង្គរបានចំណូលជាង ១៨លាន$៨ខែចុងក្រោយនេះ ធ្លាក់ចុះ៧៣.៦១%

យោងតាមការចុះផ្សាយរបស់គ្រឹះស្ថានអង្គរ បានឱ្យដឹងថា ក្នុងរយៈពេល ០៨ខែ ឆ្នាំ២០២០ កម្ពុជាលក់បណ្ណចូលទស្សនារមណីយដ្ឋានអង្គរដល់ភ្ញៀវជាតិ និងអន្តរជាតិ រកចំណូលបានជាង ១៨ លានដុល្លារអាមេរិក បើធៀបនឹងរយៈពេលដូចគ្នានៃឆ្នាំ២០១៩ គឺបានធ្លាក់ចុះរហូតដល់ ៧៣.៦១% ។

ចំពោះបញ្ហានៃការធ្លាក់ចុះនេះដែរ គឺបណ្តាលមកពីការរីករាលដាលនៃជំងឺកូវីដ១៩ នៅទូទាំងពិភពលោក ហើយប្រទេសជាច្រើននៅលើពិភពលោកក៏បានប្រកាសដាក់ប្រទេសក្នុងគ្រាអាសន្ន (បិទការចេញ-ចូលឆ្លងប្រទេស)​ ក្នុងនោះរួមមានដូចជា សហរដ្ឋអាមេរិក អ៊ីតាលី អង់គ្លេស ថៃ វៀតណាម រួមទាំងកម្ពុជាយើងផងដែរ។

យ៉ាងណាមិញ គ្រឹះស្ថានអង្គរ បានឧបត្ថម្ភប្រាក់ចំណូលពីការលក់បណ្ណចូលទស្សនារមណីយដ្ឋានទៅក្នុងមូលនិធិគន្ធបុប្ផាកម្ពុជា រយៈពេល​ ០៨ខែ ក្នុងឆាំ២០២០នេះ មានចំនួន ៧៨៦,៥៨៦​​ ដុល្លារអាមេរិក។

គួរបញ្ជាក់ផងដែរថា គិតត្រឹមព្រឹកថ្ងៃទី០១ ខែកញ្ញា ឆ្នាំ២០២០ ករណីឆ្លជំងឺកូវីដ១៩ នៅទូទាំងកម្ពុជាបានកើនឡើងដល់ចំនួន ២៧៤ (ស្រី ៥៤ នាក់ និងប្រុស ២២០ នាក់) ​  ក្នុងនោះអ្នកព្យាបាលជាសះស្បើយមានចំនួន ២៦៦នាក់  និងមនុស្សចំនួ​ន ០៨ នាក់ ទៀតកំពុងសម្រាកព្យាបាលជំងឺនៅមណ្ឌលសុខភាពចាក់អង្រែ ០៧ នាក់ និងនៅមន្ទីរពេទ្យរុស្ស៊ី ០១ នាក់ នេះបើយោងតាមក្រសួងសុខាភិបាលកម្ពុជា៕

ប្រភព​៖ Business Cambodia